| अङ्क ४२ | असोज २०६६ | वर्ष ६ |
बीउ
-- इमरोज
एक जमानादेखि
तिम्रो जिन्दगीको वृक्ष
कवितालाई
तिमीसितै बसेर
हेरिरहेको छु
फुल्दै, फल्दै र फैलँदै......
र अब
तिम्रो जिन्दगीको वृक्ष
बीउ बन्न थाल्यो
मानौँ मभित्र
कविताका पातहरू उम्रन लागे
फुल्न लागे
र जुन दिन
तिम्रो जिन्दगीको वृक्ष बीउ बन्यो
त्यस रात एउटा कविताले
मलाई बोलाएर आफूसँग बसायो
र आफ्नो नाम बतायो
अमृता-
जो वृक्षबाट बीउ बनिन्
मैले कागज लिएर आएँ
र उनी कागजमा अक्षरै-अक्षर भइन्
अचेल कविता प्रायः आउन थालेको छ
तिम्रै रूपमा तिमीले जसरी नै मलाई हेर्न थालेको छ
र केही समय मसँग बिताएर
मभित्रै कतै हराउन थालेको छ।
--
हिन्दीबाट अनुवादः कुमुद अधिकारी
श्री इमरोज, सुप्रसिद्ध कलाकार र सुप्रसिद्ध भारतीय कवयित्री अमृता प्रीतमका पति हुनुहुन्छ।
हार्दिक आभार, सुभाष नीरव,सेतु साहित्य (www.setusahitya.blogspot.com) नयाँ दिल्ली।
 | प्रतिक्रियाहरू |